Get Tested ~ HT

Tibèkiloz (TB) se yon maladi enfektyez ki transmèt soti nan yon moun al nan yon lòt pa mwayen lè a. TB sitou afekte poumon yo, men li kapab afekte lòt pati nan kò a tou tankou sèvo a, ren yo, oswa kolòn vètebral la. Si yo pa trete l, tibèkiloz ka fatal.

Pami sentòm maladi tibèkiloz (TB) moun konn genyen souvan yo se santi fatig, pèdi pwa san eksplikasyon, gen lafyèv, ak swe lannwit. Sentòm maladi TB nan poumon yo gen ladan tou tous, doulè nan pwatrin, ak touse san. Sentòm maladi TB nan lòt pati nan kò a depann de zòn ki afekte a.

Jèm TB gaye nan lè a lè yon moun ki gen maladi TB nan poumon oswa nan gòj touse, etènye, pale, oswa chante. Jèm sa yo ka rete nan lè a pandan plizyè èdtan. Moun ki respire lè ki gen jèm TB yo ka vin enfekte. Lè yon moun respire jèm TB yo, jèm yo ka tabli nan poumon yo epi kòmanse grandi. Jèm TB yo ka pwopaje soti nan yon pati nan kò a al nan lòt zòn yo, tankou ren, kolòn vètebral, oswa sèvo, pa mwayen san an.

Lè moun respire jèm TB yo epi yo vin enfekte, dabitid kò yo ka goumen epi kwape kwasans jèm sa yo. Jèm TB yo ka vin inaktif nan kò a men yo rete vivan. Yo ka reveye epi vin aktif ankò pita. Yo rele sa enfeksyon TB inaktif, oswa LTBI pou pi kout. Moun ki gen LTBI yo:

• Pa gen sentòm yo.
• Pa santi yo malad.
• Pa ka transmèt jèm TB yo bay lòt moun.
• Dabitid yo teste pozitif pou TB pa mwayen yon tès san oswa yon reyaksyon tès po.
• Yo ka devlope maladi TB si yo pa resevwa tretman pou LTBI.

Moun ki gen LTBI ta dwe resevwa tretman pou anpeche yo devlope TB. Li enpòtan anpil pou trete LTBI pou elimine TB nan Etazini. Li diminye anpil, chans pou yon moun ki gen LTBI devlope maladi TB a.

Gen de kalite tès pou detekte enfeksyon TB: yon tès po oswa yon tès san TB. Tès po ak tibèkilin Mantoux a fèt lè yo enjekte yon ti kantite likid (tibèkilin) nan po a nan pati avanbra. Apre w fin fè tès po tibèkilin lan, li enpòtan pou w retounen nan 48 a 72 èdtan oplita. Lè sa a, yon travayè swen sante ki resevwa fòmasyon pral egzamine bra ou pou wè si gen nenpòt reyaksyon.

Tès san TB a mezire fason sistèm iminitè pasyan an reyaji ak jèm ki lakòz TB a. Yon tès TB ki pozitif endike ke yon moun gen enfeksyon TB, men li pa detèmine si moun nan gen maladi TB. Radyografi pwatrin ak echantiyon krache obligatwa pou konfime maladi TB.

Moun ki gen maladi TB pwopaje jèm yo bay moun yo pase tan ak yo chak jou, tankou manm fanmi yo oswa kòlèg travay yo. Si ou te an kontak ak yon moun ki gen TB, ou ta dwe pale ak doktè ou oswa depatman sante lokal la.

Si w gen maladi TB, depatman sante lokal la ap trete w ak plizyè medikaman, anjeneral pandan 6 a 12 mwa. Li enpòtan anpil pou w fin pran tout medikaman pou trete TB a nèt. Sispann medikaman twò bonè oswa pa pran li kòrèkteman ka lakòz maladi a retounen oswa fè jèm yo reziste kont medikaman yo.

Gen plizyè tretman pou LTBI ki dire ant twa ak sis mwa pou fin suiv tretman an. Li enpòtan pou w fin suiv tout tretman pou LTBI a nèt.

• Moun ki anba mezi eksepsyon pou zafè imanitè ki fèk rive ki soti nan peyi yo ki gen gwo pousantaj TB nan popilasyon yo.
• Moun ki te fèk antre an kontak ak yon moun ki gen TB.
• Moun ki gen maladi yo tankou VIH oswa dyabèt ki febli sistèm iminitè a.
• Moun ki montre siy tibèkiloz yo.
• Moun ki te viv oswa ki te travay nan anviwònman ki gen gwo risk (tankou prizon oswa refij pou sanzabri) yo.

Tès TB a gratis pou refijye imanitè ki soti nan sèten peyi, tankou Ikrèn, Ayiti, Venezyela, Kiba, Nikaragwa, ak lòt yo. Kontakte depatman sante lokal ou a pou konnen si w kalifye pou yon tès gratis.